Соопштенија
IOM
Средба на претседателот Иванов со регионалниот директор на Меѓународната организација за миграција (ИОМ)
Среда, 22 Февруари 2017

Претседателот на Република Македонија, д-р Ѓорге Иванов, денеска ja прими г-ѓа Аргентина Шабадос, регионален директор на Меѓународната организација за миграција (ИОМ) задолжен за Југоисточна Европа, Источна Европа и Централна Азија.

На средбата беше разговарано за актуелната состојба со бегалската и мигрантската криза, стратегиите и активностите на Меѓународната организација за миграција и улогата на Република Македонија во справување со мигрантската криза.

Претседателот Иванов истакна дека Република Македонија ги спроведува мерките и постапува согласно заклучоците на Европскиот совет, со цел превенирање на заканата од илегална миграција, заштита на границите и зачувување на интегритетот на Шенгенската зона. „Безбедносните служби на Република Македонија се справуваат со мигрантската криза на одговорен и професионален начин, со хуманитарна поддршка во согласност со највисоките европски и меѓународни стандарди", посочи македонскиот претседател.

Г-ѓа Шабадос го информираше претседателот Иванов за стратегиите и приоритетите на ИОМ во однос на натамошната соработка со Република Македонија во сферата на миграциите. Регионалниот директор изрази задоволство од односот и третманот на Република Македонија кон бегалците и мигрантите, согласно сите меѓународните стандарди и ги поздрави начините на кои земјата се справува со мигрантската криза.

Македонскиот претседател се заблагодари за досегашната помош од ИОМ и ја посочи потребата од зајакнување на капацитетите на македонските безбедносни институции, при што беа разгледани можностите за поголема поддршка од страна на Меѓународната организација за миграција во јакнењето на капацитетите на АРМ.

Регионалниот директор на ИОМ изрази благодарност на македонските институции за соработката и уверување дека и во иднина ќе продолжат со поддршката во согласност со потребите на Република Македонија.

Visegrad4
Традиционален работен ручек со амбасадорите на земјите од Вишеградската група
Понеделник, 13 Февруари 2017

Претседателот на Република Македонија, д-р Ѓорге Иванов, денеска го приреди традиционалниот работен ручек со амбасадорите на земјите – членки на Вишеградската група, акредитирани во Република Македонија.

На средбата присуствуваа амбасадорот на Република Полска, Н.Е. г. Јацек Мултановски, амбасадорот на Чешката Република, Н.E. г. Мирослав Рамеш, амбасадорот на Словачката Република, Н.Е. д-р Мартин Безак и амбасадорот на Унгарија, Н.Е. г. Ласло Иштван Дукс.

Соговорниците разменија мислења околу можностите за продлабочување на меѓусебната соработка, за актуелната политичка состојба во Република Македонија, за процесот на интеграција во ЕУ и НАТО, како и за предизвиците со кои се соочува Европската Унија и Европа и позициите на земјите од Вишеградската група во однос на клучните предизвици.

Во однос на политичката состојба, на средбата беше истакнато дека од клучно значење за Република Македонија е надминувањето на политичката криза и што поскоро формирање на Влада која ќе биде посветена на европската агенда и економски развој и која ќе има капацитет да се справува со предизвиците од мигрантската и безбедносната криза. Амбасадорите се согласија дека е неопходен исчекор на земјата во однос на европските и евроатланските интеграции.

Претседателот Иванов ја поздрави континуираната поддршка од Вишеградската група за одржување на динамиката на процесот на проширување на ЕУ и силната поддршка за што поскоро започнување на преговорите за членство на Република Македонија.

Македонскиот претседател се заблагодари за личниот ангажман и посветеноста на амбасадорите во унапредување на односите со Република Македонија, како и за доследната помош од овие земји во справување со мигрантската криза.

Амбасадорите ги реафирмираа заложбите за продолжување на меѓусебната соработка во справување со мигрантската криза и со безбедносните предизвици на земјите од Централна и Источна Европа.

На средбата беше разговарано и за претстојните активности и планови за размена на посети на највисоко ниво меѓу Република Македонија и земјите од Вишеградската група.

PRMportret
Честитка до избраниот Претседател на Сојузна Република Германија
Понеделник, 13 Февруари 2017

Претседателот на Република Македонија, д-р Ѓорге Иванов, упати честитка до г. Франк Валтер Штајнмаер по повод изборот за Претседател на Сојузна Република Германија

Почитуван господине Штајнмаер,

Ми претставува особена чест и големо задоволство, во името на граѓаните на Република Македонија и во мое лично име, да Ви упатам најсрдечни честитки по повод Вашиот избор за претседател на Сојузна Република Германија, како и да Ви посакам многу успех во извршувањето на оваа одговорна функција.

Вашиот избор на оваа функција е исклучително значаен. Тој се случува во период на бројни сериозни предизвици со кои се соочува Европа, а единството, довербата и неопходноста од повеќе соработка во рамките на Европската унија се пред големи искушенија. Длабоко сум убеден дека Вашето долгогодишно дипломатско искуство и меѓународен углед ќе резултираат со уште позајакнати односи со нашиот регион, на кој му е неопходна поддршка со цел постигнување на одржлива политичка стабилност, безбедност, економски развој.

Почитуван господине Штајнмаер, сакам да Ве уверам дека Република Македонија ќе го продолжи реформскиот процес со цел достигнување на сите европски стандарди и критериуми, и ќе продолжи да придонесува кон добрососедсвото и регионалната соработка. Искрено се надевам дека Сојузна Република Германија како докажан пријател на Република Македонија, ќе продолжи да ги поддржува нашите заложби и напори за интегрирање во Европската унија и НАТО.

Дозволете ми, во оваа пригода и да искажам особено задоволство од достигнатото ниво и континуираниот позитивен тренд во односите и соработката меѓу Република Македонија и Сојузна Република Германија. Исто така сакам да ја изразам целосната подготвеност да ја продолжиме соработката што ја имавме со Вашитe ценети претходници. На тој начин ќе дадеме придонес за натамошно унапредување на односите во сите сфери од заемен интерес, како на билатерален, така и на мултилатерален план.

Со искрени желби за добро здравје, натамошна успешна работа и лична среќа, Ви ги упатувам, господине Штајнмаер, изразите на моето највисоко почитување.

д-р Ѓорге Иванов

PRM_Han_4
Средба со комесарот за европска соседска политика и преговори за проширување на Европската Унија, г. Јоханес Хан
Петок, 10 Февруари 2017

Претседателот на Република Македонија, д-р Ѓорге Иванов, денеска го прими комесарот за европска соседска политика и преговори за проширување на Европската Унија, г. Јоханес Хан.

На средбата, двајцата соговорници разменија мислења за актуелната политичка состојба во Република Македонија и можностите за што поскоро разрешување на политичката криза.

Надминувањето на политичката криза е од клучно значење за Република Македонија да може целосно да се посвети на европските реформи и да продолжи во остварување на евроинтеграциски цели, истакна претседателот Иванов.

На средбата беше потенцирана неопходноста од што поскоро формирање на Влада на Република Македонија, бидејќи единствено со целосно функционални институции државата ќе биде подготвена да се справува со сите предизвици.

Во контекст на актуелната состојба, претседателот Иванов изрази незадоволство од отсуството на јавна осуда на мешањето во внатрешните работи на Република Македонија од страна на некои соседни земји.

Еврокомесарот Хан го запозна претседателот Иванов за средбите со лидерите на политичките партии и изнесените ставови, и истакна дека новата Влада треба да биде доследна на европската перспектива и фокусирана на европската иднина на земјата.

Претседателот Иванов уште еднаш укажа дека нестабилноста во политичкиот живот и тензичноста во меѓуетничките односи се последица на предолгата статус-кво состојба на Република Македонија и побара поактивен ангажман и поддршка од комесарот Хан. Комесарот Хан истакна дека постои зголемена свест меѓу државите членки на ЕУ за неопходноста од деблокада на интеграциите и за таа цел е потребно формирање на Влада посветена на европските интеграции.

Македонскиот претседател на средбата со Хан истакна дека како и досега, така и во иднина, ќе постапува во рамки на Уставот и во интерес на државата и на граѓаните на Република Македонија. Воедно, Претседателот истакна дека очекува од новата Влада да има два клучни приоритета: Прво, заштита на државните интереси на Република Македонија, што подразбира зачувување и зацврстување на унитарниот карактер на државата. Второ, системска реформа по кризата во која ќе бидат опфатени субјектите на системот за национална безбедност на Република Македонија.

PRM-logo
Реакција од Кабинетот на Претседателот на Република Македонија на тврдењата на политичката партија СДСМ
Петок, 03 Февруари 2017

Претседателот на Република Македонија, д-р Ѓорге Иванов, отсекогаш постапувал согласно Уставот и законите на Република Македонија и во рамки на своите права, обврски и должности.

Тврдењата на СДСМ дека претседателот Иванов лаже дека постапил како претседателот Глигоров и дека го крши Уставот претставуваат груба лага и груба манипулација со јавноста.

Наводите на СДСМ дека претседателот Глигоров го доделил мандатот на второпласираната партија на тогашните избори, повикувајќи се на објавено соопштение од 14 јули 1992 година, претставуваат груба лага, бидејќи информациите изнесени во соопштението од 14 јули 1992 година се однесуваат на КОНСУЛТАЦИИ кои претседателот Глигоров ги извршил со СДСМ. Во соопштението јасно е укажано дека на овие консултации, претседателот Глигоров му предлага на СДСМ како на втора партија по бројот на пратеници во Собранието, да посочат КАНДИДАТ, кој претседателот на Републиката би го определил за мандатар за состав на Владата на Република Македонија.

G01

Факт е дека во соопштението од 14 јули 1992 година, на кое се повикува СДСМ, претседателот Глигоров НЕ ГО ДОВЕРУВА мандатот на СДСМ за состав на Влада, туку од нив бара да посочат кандидат за мандатар.

Три дена подоцна, на 17 јули 1992 година, СДСМ во присуство на сите партии кои го сочинувале парламентарното мнозинство, го информираат претседателот Глигоров дека успеале да обезбедат парламентарно мнозинство и го определуваат Петар Гошев за мандатар.

G02


Истиот ден, на 17 јули 1992 година, претседателот Глигоров мандатот за состав на Влада го доверува на Петар Гошев.

G03

Во врска со тврдењата на политичката партија СДСМ, според кои, претседателот Иванов наводно поставува дополнителни услови за доделување на мандат за состав на владата, Кабинетот на Претседателот на Република Македонија оценува дека се работи за небулозен и груб обид за манипулација.

Барањата, што претседателот Иванов ги истакна не претставуваат услови, туку политички ставови на претседателот Иванов за идните приоритети на новата Влада, кои се конзистентни и се однесуваат на сите политички структури во земјата. Претседателот Иванов има целосно легитимно право да изнесува политички ставови и барања поврзани со државните интереси и од тоа нема да отстапи и во иднина.

Претседателот Иванов тие приоритети ги истакна и во неговото годишно обраќање, каде и тогаш јасно порача, прво - заштита на државните интереси на Република Македонија, што подразбира зачувување и зацврстување на унитарниот карактер на државата, и второ - системска реформа по кризата во која ќе бидат опфатени субјектите на системот за национална безбедност на Република Македонија.

Доколку од политичката партија СДСМ сметаат дека овие барања на претседателот Иванов не треба да претставуваат приоритети за државата и граѓаните на Република Македонија, тогаш СДСМ нивните ставови по овие прашања треба транспарентно да ги соопштат на јавноста, а не преку груби лаги и манипулации да го напаѓаат македонскиот претседател дека поставува услови за добивање мандат.



Ustaven
Средба со претседателот на Уставниот суд на Република Македонија, г. Никола Ивановски
Вторник, 31 Јануари 2017
 
Почеток < Пред 1 2 3 4 5 6 7 8 9 10 Следно > Крај
Страница 1 од 141